သာသနာ့ ဝန်ဆောင် သာမဏေကျော်အဖွဲ့ ဖြစ်ပေါ်လာပုံ

မြန်မာနုိုင်ငံလွတ်လပ်ရေး ရပြီးစ အချိန် ၁၉၄၈-ခုနှစ်တွင် လမ်းမတော်သရက်တောတိုက် ကျောက်ပန်းတောင်း ဆရာတော် ဦးဉာဏုတ္တရ ၏ ဆုံးမသြဝါဒကို နာယူလျက် သုဓမ္မဝတီ ဦးပန်းမောင် နှင့် သာသနာပြုဘက် ပုဂ္ဂိုလ်များသည် ဗုဒ္ဓသာသနာအကျိုး မျှော်ကိုး၍ အနာဂတ်ကာလ သာသနာကို ယခု ရှင်သာမဏေများက စောင့်ရှောက်ကြမည်ဟု ယုံကြည်ကြသောကြောင့် အာဇာနည်သာမဏေများကို ချီးမြှင့်ရန်ရည်ရွယ်ပြီး ရှင်သာမဏေ စာပြန်ပွဲကြီးကို ကျင်းပခဲ့ကြပါသည်။

ထိုသို့ ကျင်းပရာတွင် စာဖြေဌာန အတိအကျမရှိဘဲ သင့်လျော်သည့်နေရာတွင် ကျင်းပ ခဲ့ပါသည်၊ စာအောင်ဆုနှင်းပွဲကိုမူ ရန်ကုန်မြို့တော် ခန်းမကြီး၌ ကျင်းပရာ၊ သမ္မတကြီး စပ်ရွှေသိုက် စသော နိုင်ငံတော် အကြီးအကဲများက နှစ်စဉ် တက်ရောက် ချီးမြှင့်ခဲ့ကြပါသည်။

၁၉၆၂-ခု မေလ(၃၁)ရက်နေ့တွင် ယခုလက်ရှိ ရှင်သာမဏေဓမ္မဗိမာန် မြေနေရာ၌ ရွှေတိဂုံစေတီတော် ဘဏ္ဍာတော်ထိန်းအဖွဲ့က ရှင်သာမဏေစာပြန်ပွဲအဖွဲ့ကို ဗိမာန်ကြီး ဆောက်လုပ်ရန် နေရာချထားခဲ့ပါသည်၊ ထိုအချိန်တွင် ဦးပန်းမောင် ကွယ်လွန်ပြီးဖြစ်၍ သုဓမ္မဝတီ ဦးတင်ထူးက ဥက္ကဋ္ဌ အဖြစ် တာဝန်ယူချိန် ဖြစ်ပါသည်။ဆက်လက်၍ မ န္တလေး မစိုးရိမ် ဆရာတော် ဘုရားကြီးအမှူးပြုသော ဆရာတော်များ ဦးဆောင်ပြီး ဗိမ္မာန်ကြီးကို ပန္နက်တင် အုတ်မြစ်ချခဲ့ပါသည်။ ရန်ပုံငွေ အခြေအနေအရ အဆောက်အအုံကြီးကို တဖြည်းဖြည်း တည်ဆောက်လာခဲ့ရာ ၁၉၇၄-ခုနှစ်တွင် ငွေဇင်ယော်ဆီစက် ပိုင်ရှင် ဦးကြင်-ဒေါ်စောညွန့် မိသားစုတို့က မတည်လှူဒါန်းသောကြောင့် အပြီးသတ်ခဲ့ပါသည်။

ရှင်သာမဏေစာပြန်ပွဲကြီးကိုလည်း ဆက်လက်ကျင်းပလာရာ (၃၃)ကြိမ်မြောက်အပြီး ၁၉၈၇-ခုနှစ်တွင် ဥက္ကဋ္ဌကြီး ဦးတင်ထူး မျက်စေ့ကွယ်သွား၍ စာပြန်ပွဲကြီးကို ဆက်လက်ကျင်းပရန် အခက်အခဲဖြစ်နေချိန် အခြေအနေအရ ဓမ္မဗိမာန်ကြီးကို လုံခြုံရေး ရဲတပ်ဖွဲ့ဝင်များအား နေရာချ ထားခဲ့ရာ ထိုအချိန်မှစ၍ စာပြန်ပွဲ အဆက်ပြတ်သွားခဲ့ပါသည်။ 

မင်္ဂလာဗျူဟာ သာမဏေကျော်စာတော်ပြန်ပွဲ

၁၉၈၆-ခုနှစ်၊ မြိတ်မြို့ဘုရားငါးဆူကျောင်းတိုက် ဆရာတော် ရန်ကုန်မြို့သို့ ကြွရောက်စဉ် ဦးထိန်ဝင်း၊ ဦးအောင်၊ ဦးကြည်တွဲ၊ ဒေါ်အေးအေး တို့အားခေါ်ယူ၍ ”ရှင်သာမဏေများကို ချီးမြှင့်သည်အနေဖြင့် မန္တလေး ပရိယတ္တိသာသနာဟိတအသင်း ကဲ့သို့ ရန်ကုန်မြို့တွင်လည်း သာသနာလင်္ကာရ သာမဏေကျော်စာပြန်ပွဲ ရှိသင့်ကြောင်း” သြဝါဒ ပေးခဲ့ပါသည်။

ဆရာတော်ဘုရားကြီး၏ သြဝါဒကို နာယူလျက်၊ သာသနာပြုဘက်များ ဖြစ်ကြသော မင်္ဂလာဗျူဟာအသင်းချုပ်ဥက္ကဋ္ဌ ဦးအောင်သိမ်း၊ ဦးချစ်လိူင်၊ ဗိုလ်မှူးဗလ တို့နှင့် စည်းဝေးတိုင်ပင်ပြီး မင်္ဂလာဗျူဟာသာမဏေကျော် စာတော်ပြန်ပွဲအဖွဲ့ကြီး ကိုဖွဲ့ကာ ၁၉၈၈-ခုနှစ်တွင် စတင်ကျင်းပရန် ဆုံးဖြတ်ခဲ့ကြပါသည်။

စာတော်ပြန်ပွဲ အဖွဲ့ကိုလည်း အောက်ပါအတိုင်း ဖွဲ့စည်းခဲ့ပါသည်။

မှော်ဘီ သာသနာ့ဝန်ဆောင် ပန်းကုံးဆရာတော်၏ သြဝါဒကို ခံယူလျက် ဦးထိန်ဝင်းက နာယက အဖြစ်ဆောင်ရွက်၍၊ ဥက္ကဋ္ဌ ဦးအောင်သိမ်း၊ ဒုတိယဥက္ကဋ္ဌ ဗိုလ်မှူးဗလ၊ အတွင်းရေးမှူး ဦးချစ်လှိုင်၊ တွဲဖက် အတွင်းရေးမှူး ဦးကြည်တွဲ၊ ဘဏ္ဍာရေးမှူး ဦးအောင်၊ စာရင်းစစ် ဒေါ်မြင့်မြင့် နှင့် အဖွဲ့ဝင်များအဖြစ် ဦးထွန်းလှိုင်၊ ဦးသိမ်းအောင်၊ ဦးတင်ရွှေ၊ ဒေါ်အေးအေး၊ ဒေါ်လှသွင်၊ ဦးအုံးခင်၊ ဦးဖေကြည် တို့ဖြင့်ဖွဲ့စည်းခဲ့ပါသည်။ ရုံးအဖွဲ့မှူး အဖြစ် ဦးမြင့်သောင်း အားတာဝန်ပေး၍ စာမေးပွဲလုပ်ငန်းများကို ဆောင်ရွက်ခဲ့ကြပါသည်။

ရှင်သာမဏေဓမ္မဗိမာန် သာသနာ့ဝန်ဆောင်အဖွဲ့ 

၁၉၉၁-ခု၊ စက်တင်ဘာလတွင် ရှင်သာမဏေစာပြန်ပွဲ အဖွဲ့၏ ဥက္ကဋ္ဌဖြစ်သူ ဦးတင်ထူး (သုဓမ္မ ဝတီပုံနှိပ်တိုက်) နှင့် အမှုဆောင်များသည် ၁၀ရ-မင်းရဲကျော်စွာလမ်း နေအိမ်တွင် ဦးထိန်ဝင်း နှင့်အဖွဲ့အား သာသနာပြုလုပ်ငန်းများ ဆက်လက်ဆောင်ရွက်ရာတွင် ဤဓမ္မာရုံကြီးကို အသုံးချ ပါရန် တိုက်တွန်းဆွေးနွေး ကြပါသည်။

၁၉၉၁-ခု၊ ဒီဇင်ဘာလ(၂၃)ရက်တွင် ဦးတင်ထူးအဖွဲ့နှင့် ဦးထိန်ဝင်းအဖွဲ့တို့ ထပ်မံတွေ့ဆုံရာ ဦးတင်ထူးက မိမိတို့အဖွဲ့အနေနှင့် ရှင်သာမဏေစာပြန်ပွဲကို ဆက်လက်ကျင်းပနိုင်ခြင်း မရှိတော့သဖြင့် ဦးထိန်ဝင်းတို့ ကျင်းပလျက် ရှိသော မင်္ဂလာဗျူဟာသာမဏေကျော် စာတော်ပြန်ပွဲ လုပ်ငန်းကို ဤဓမ္မာရုံကြီး၌ပင် ကျင်းပ၍ ဓမ္မဗိမာန်ကြီးကိုလည်း ဆက်လက်စောင့် ရှောက်ရန် အပြီးအပိုင် လွှဲအပ်ခဲ့ပါသည်။

ဤသို့ဖြင့် ဦးတင်ထူးတို့၏ မူလအမှုဆောင်များနှင့် မင်္ဂလာဗျူဟာ သာမဏေကျော် စာတော်ပြန်ပွဲ အဖွဲ့မှအမှုဆောင်များ စုပေါင်းပြီး အလုပ်အမှုဆောင်အဖွဲ့သစ်ကို ပြန်လည်ဖွဲ့ စည်းခဲ့ပါသည်။

ယင်းနောက်တွင် အဖွဲ့ဝင်များ၏ ဆန္ဒနှင့်အညီ ရှင်သာမဏေဓမ္မဗိမာန်ကြီး၌ စာပြန်ပွဲလုပ်ငန်း တစ်ခုတည်း ဆောင်ရွက်နေခြင်းထက်၊ ဗုဒ္ဓသာသနာတော်ကြီး သန့်ရှင်း တည်တန့် ပြန့်ပွားရေး အတွက် အခြားသာသနာပြု လုပ်ငန်းများပါ ဆောင်ရွက်နိုင်ရန် ရည်ရွယ်ကာ အဖွဲ့စည်းမျဉ်း ဥပဒေကို ပြန်လည်ရေးဆွဲခဲ့ကြပါသည်။

ရွှေတိဂုံစေတီတော်ဂေါပကအဖွဲ့သို့လည်း အသင်းအဖွဲ့ မှတ်ပုံတင်လျှောက်ထားခဲ့ရာ ၁၉၉၂-ခု ဒီဇင်ဘာလ(၁၅)ရက် နေ့စွဲဖြင့် မှတ်ပုံတင်ခွင့်ရရှိခဲ့ပါသည်။

ထိုအချိန်တွင် ဓမ္မာရုံကြီး၌ လုံခြုံရေးအဖွဲ့ဝင်များ နေရာချထားသဖြင့် နှစ်စဉ် နတ်တော်လ၌ ကျင်းပမြဲဖြစ်သော သာမဏေကျော်စာတော်ပြန်ပွဲ (၃)ရက် ကျင်းပပြုလုပ်ခြင်းမှတပါး အခြားသာသနာရေး လုပ်ငန်းများဆောင်ရွက်နိုင်ခြင်း မရှိခဲ့ပါ။

၁၉၉၄-ခု၊ ဒီဇင်ဘာလတွင် ရန်ကုန်တိုင်းစစ်ဋ္ဌာနချုပ် တိုင်းမှူး၏ ကူညီစောင့်ရှောက်မှုဖြင့် ဓမ္မာရုံကြီးကို ပြန်လည်အသုံးချခွင့် ရရှိခဲ့ပါသည်။

ဓမ္မဗိမာန်ကြီး ရေရှည်တည်တံ့ခိုင်မြဲရန်၊ ဤ သာမဏေကျော်စာတော်ပြန်ပွဲကို နှစ်စဉ် မပျက်မကွက် ကျင်းပရန်နှင့် အခြား ဗုဒ္ဓသာသနာအတွက် အကျိုးပြုလုပ်ငန်းများ စနစ်တကျဆောင်ရွက်နိုင်ရန် ဟူသော ရည်ရွယ်ချက်များချမှတ် ထားပါသည်။